Tag

Blog honetan behin baino gehiagotan hitz egin dugu Creative Commons lizentzien inguruan (Creative Commons umeentzat euskaraz azaldua, Creative commons edukiak bilatzeko guneen bilduma, Creative commons hezkuntzan (ikasle eta irakasleekin erabiltzeko aurkezpena). Bada, oraingoan Mondragon Unibertsitateko irakasleentzat sortutako bideotutoriala uzten dut, zuei ere lagungarri gertatuko zaizuelakoan.

Unibertsitatean, besteak beste, online taldean nabil eta fakultate ezberdinetako irakasleen formazioan dihardut. Zeregin horretan, euren online modalitateko ikastaroak sortzen edota hobetzen laguntzen diet, bai ikuspegi pedagogiko zein teknologikotik. Ez dago esan beharrik, online ikastaroak aberaste aldera, gure irakasleek gero eta gehiago erabiltzen dituztela Interneten topatutako irudiak, aurkezpenak edota bestelako baliabideak.

Hari beretik, formazio premiak aztertzerakoan, konturatuta geunden gehiengo batek ezer gutxi zekiela Creative Commons lizentzien inguruan. Hezkuntza alorrean, zalantzarik gabe, oso garrantzitsua da ikasleei jakinaraztea -eta guk geuk ere jakitea- Interneten dauden argazki eta bestelako eduki guztiak ezin direla modu librean erabili. Halaber, jakin beharko genuke, besterik aipatu ezean, edukiek copyrighta dutela.

Komeni da, beraz, Creative Commons lizentziak zer diren ezagutzea eta lizentzia horiek dituzten edukiak non eta nola topa ditzakegun jakitea. Ondorengo bideotutorial honetan horixe azaltzen da labur-labur:

Artikulu osoa irakurri nahi baduzu, jatorrizkoa Mondragon Formación Online blogean topatuko duzu.

Gehigarriak:

• El respeto por los derechos de autor, tarea pendiente de la educación escolar, Eduteka
• Aspectos legales de las TIC en educación, Antonio Omatos
• Open Attribute, Firefox eta Chromerako gehigarria (bisitatzen ari garen guneak CC lizentzia duen jakiteko)

Zure YouTubeko kanalera igotzen dituzun bideoei publizitatea kentzea posible da. Bi aukera daude: ezarpenetan aukera hori ipintzea bideo guztietarako edo banan-banan hautatzea zein bideori kendu eta zeini ez.

Azken aukera honetarako, aldez aurretik zure kanalaren ezarpenetan (kanalaren ezarpenak > eginbideak) dirua irabazteko aukera gaituta izan behar duzu. Nik ez dudanez horrela, igotako bideo guztiei publizitatea kentzeaz mintzatuko naiz. Urrats hauek jarraitu besterik ez dago:

1. Sartu zure Youtubeko kontuan eta zabaldu menua (zure irudiaren eskuinaldean).

 

2. Hautatu ‘YouTube ezarpenak‘:

 

 

3. Hautatu ‘Ez onartu nire bideoen ondoan iragarkiak bistaratzea‘

 

 

Hau guztia eta gehiago Wwwhat’s new blogean ikus dezakezu:  Cómo deshabilitar la publicidad en videos de YouTube propios

Gmail-en posta kontua duzuenok konturatuko zineten legez, Googleko zerbitzu hau etengabe ari da aldatzen: ezaugarri berriak, ezarpenak, itxura… Azkenetako bat da sarrerako ontzia bistaratzeko modu berria, fitxen bidezkoa. Gauzak horrela, sarrera ontzira iristen zaizkigun mezuak fitxa ezberdinetan sailka ditzakegu: mezu nagusiak, sare sozialak, eskaintzak, eguneratzeak, eta foroak. Jasotako mezuak horrela bistaratu ahal izateko, aukera berri hau aktibatu baino ez dugu egin behar. Aktibatzeko ondorengo urratsak jarraitu behar dira:

1. urratsa. Sartu zure Gmail kontuan, ohi bezala.

2. urratsa. Hautatu eskuineko ikonoa, ezarpen orokorrak aldatzen dituena. Bistaratze modu berria aktibatzeaz gain, ikonoaren gainean klik eginda, postaren itxura, bistaratzearen trinkotasuna eta bestelako ezarpernak aldatu ahal izango dituzu.

3. urratsa. Konfiguratu sarrera-ontzia hautatu (zerrendaren erdialdean). Oharra: ez baduzu ikusten aukera hori, atera Gmail-etik eta berriz sartu. Oraindik ere ikusten ez baduzu, Googlek aukera aktibatu arte itxoin beharko duzu.

4. urratsa. Leiho bat zabaldu ondoren, hautaketa egin beharko duzu. 5 fitxa onartzen dira:

• Nagusia: fitxarik ez duten mezu-kategoriak, atal honetan ikusiko dira.
• Sare sozialak: sare sozialetako mezuak, multimedia-partekatzeei buruzkoak, zita-zerbitzuenak eta bestelako webgune sozialenak.
• Eskaintzak: promozioak, eskaintzak eta bestelako marketin-mezuak.
• Eguneratzeak: Automatikoki sortutako eguneratze pertsonalak, berrespenak, ordainagiriak eta fakturak barne.
• Foroak: Eztabaida-talde eta posta-zerrendetako mezuak.

Hautatu horietatik fitxa ezberdinetan ikusi nahi dituzun mezuak.

 5. urratsa. Beste leiho bat zabalduko da. Ados klikatu.

Hauxe izango da emaitza:

Eguneratzea:

Saltseatzen ari nintzela, ohartu naiz mezuak mezuak fitxa batetik bestera eraman daitezkeela. Horretarako, ipini mugitu nahi duzun mezuaren gainean eta eskuinarekin klikatu. Arrastaka eraman fitxa batetik bestera:

 

Bistaratzeko modu berrira ohitzea pittin bat kostatu zaidan arren, orain oso praktikoa iruditzen zait. Pentsatzen dut egun batzuk barru, Googlek zuzenean aktibatzeko aukera emango duela. Bitartean, baliagarria izango zaizuelakoan, hortxe uzten ditut jarraibideak.

Iturria: How to enable the new tabbed Gmail inbox right now. Paul Morris, Redmond Pie.

Oporretatik bueltan PLEari buruz emango ditudan hainbat ikastarori begira, ‘txuleta’ batzuk prestatzen ari naiz, begiratu batean kontzeptu batzuk errazago ulertu ahal izateko. Aurrekoan, Twitterri buruzko hau, Awesome Twitter Cheat Sheet for Teachers,  topatu nuen Educational Technology and Mobile Learning blogean eta, oinarrizkoa biltzen duela irudituta, euskaratu egin dut. Hementxe uzten dut, hasiberrientzat baliagarria izan daitekeelakoan:

Gaia interesekoa baduzue, hau ere gustatuko zaizue (euskaratu gabe, oraingoz): A great Twitter cheat sheet for teachers.