Tag

Aurrekoan, Gorka Julio (@teketen) eta biok Mondragon Unibertsitateak eskaintzen duen Euskal Kulturgintzaren Transmisioa aditu tituluko saio batera gonbidatu gintuzten. Oso gustura onartu genuen 3. edizio honetan parte hartzeko gonbidapena -are gehiago gure lagun Patxi Gaztelumendik graduondokoari eskaini dion ekultura.net blogean idatzitako hitzak irakurri ondoren-, eta hantxe izan ginen kontu kontari bakoitza ordu pare batez.

Jende interesgarri mordo batek hartu du parte aurtengo edizioan. Gai anitzak eta hainbat zaletasun ezberdin, baina pasio partekatu bat: euskara.

Ikasturte honetan ere jarraipen estua egin zaio medio ezberdinetatik EKTri: Joanes Imaz kazetariak irratsaio bereziak prestatu ditu Julian Belokik aurkezten duen Jakin minez irratsaiorako, eitb.com webgunearen barruan orri bat eskaini zaio graduondoari, Patxi Gaztelumendiren jarraipena aipatutako ekultura.net blogean, Berria.tb-n laburpen bideo guztiak daude ikusgai eta Berria egunkarian asteartero Beñat Gaztelumendiren kronika argitaratu dute.

Banuen asmoa honi buruz lehenago hitz egiteko; halere, gauza bat dela eta bestea, azkenean, egitekoen zerrenda luzean geratuta zegoen gaur Agirregabiriak eta Rober Gutiérrezek tuit banatan gure parte hartzea gogorarazi didaten arte. Beraz, handik eta hemendik aterata, hementxe uzten ditut gure saioen laburpenak eta irratirako egindako elkarrizketak:

Bideoa:

Irratsaioa

Zorionak EKT taldeari, azken urteetan egindako lanagatik!

Twitterren (@profenacho08 -ren bidez) izan nuen lehengoan Pikipalabraren berri: Pasapalabra jokoa, baina haurrentzat egokitua. Sartu eta saltseatzen ibili naiz ea nire Hitzapasaren antzik baduen edo, eta pila bat gustatu zait. Dirudienez, Nafarroako Gobernuaren Hezkuntza Sailak garatutakoa da, eta baditu hainbat berezitasun Hitzapasari gehitu nahi nizkiokeenak:

• Bakarka edo binaka joka daiteke.
• Joko hasieran hauta daiteke maila (1, 2 edo 3).
• Ez da hitza asmatu behar, hiru aukeren artean zuzena dena hautatu baizik. Honek saihestuko lituzke batzuetan tildekin, etab. izaten ditugun arazoak.
• Hitzapasan ez bezala, datu-base batean daude galderak guztiak (ez artxibo itxietan).

Egia esateko, Hitzapasari hobekuntzak egin nahi hori ez da oraingoa, badaramat denbora bat formatuz aldatu eta beste hainbat berrikuntza eta aukera txertatu nahian, baina ez naiz informatikaria eta egin nahi ditudan aldaketa horientzat laguntza profesionala behar dut. Bueno, ba, Nafarroako Gobernuko Hezkuntza Sailarekin harremanetan jarri, alde batetik, eta, bestetik, laguntza hori lortzen dudan bitartean, bota begitxo bat eredu honi eta iradokizunen bat baduzue, ongi etorria izango da.

 

 

Lehengo astean, Azkue Fundazioak gonbidatuta, “Sarea Pil-pilean”, jakintza librearen II jardunaldietan parte hartzeko aukera izan nuen. 3 ataletan banatu zen jardunaldia. Lehenengoan,”Zizka-mizkak” deituriko atalean, Interneti, teknologiari, euskarari eta ezagutza libreari lotutako 5 egitasmo desberdin azaldu genituen, PechaKucha formatuan (20 irudi/20 segundo): interneteko tendentziak (Iruri Knör), Berriketan.info (Jon Ordoñez), Kaixomaitia.com (Iñigo Arandia), Gaztezulo.com (Igone Fernandez) eta nik euskari lotutako sarean ditudan hainbat egitasmo aurkeztu nituen “Alez ale, elez ele” aurkezpenean.

Jarraian, talde dinamika jarraituz, ondorengo hiru galderen inguruan hausnarketa egin genuen:

• Zer egin daiteke gazteenen artean jakintza librea sustatzeko?
• Zer egin dezakete erakundeek interneten euskararen erabilera normalizatzeko?
• Zer egin dezakegu sarean euskarazko eduki gehiago sortzeko?

Hausnarketatik ateratako ondorioen zain geratuko gara. Bitartean, hementxe uzten ditut nire aurkezpenaren bideoa eta erabilitako irudiak. Kronika osoa (“Sarea Pil-pilean”, jakintza librearen II jardunaldiak ospatu ziren atzo Deustuko CRAI liburutegian) Azkue Fundazioko orrian irakur dezakezue.

Aurkezpena:

Alez ale

View more presentations from Maite Goñi.

 

Bideoa:

Opor hauetan hartu dut tartetxo bat Hitzapasa jokoaren gunea berritzeko. Hitzapasan bertan azaldu dudan bezala, bere garaian, politagoa-edo zelako, txantiloi berezi samarra hautatu nuen eta, maiz, erabiltzaileek zailtasunak izaten zituzten edukietara heltzeko. Kontua da, atzo goizean horretan ari nintzela, Xabier Mendiguren Elizegik Hitzapasak sotzen laguntzeko eskaini zuela bere burua eta nik, adiskidetasunaz abusatuz, pentsatu nuen berak ederki asko menperatzen duen literaturan oinarritutako Hitzapasa bat (edo gehiago) ekoiztea oso ondo legokeela. Esan eta egin! Handik gutxira hortxe neuzkan korreoan Atik Zra bitarteko definizioak, euskal literaturaren 1. urratserako. Hementxe duzue Xabierrek bidalitako definizioekin sortutako Hitzapasa:

HP literatura 1-1 html	HP literatura 1-1 swf

Hari horretatik tira eginez, garbi dago denok badugula alor zehatz batean jakintza gehixeago edo pasioz betetzen gaituen gairen bat edo beste. Informatikaria bazara, esate baterako, ez al zenuke informatikari buruzko Hitzapasa bat di-da batean sortuko? Eta zuk, musikari edo musikazale amorratua zaren horrek, ez al zenuke euskal musikari buruzko errosko bat egingo? Edo zinemari buruzkoa? Politikariren bat animatuko al litzateke? Imajinatzen al duzue Iruña-Veleia aferari buruzkoa, adibidez? Ez dakit, linguistika, zuzenbidea, Donostia, Ordiziako historia, Laboa, Lete, telebistako programaren bat, edozein euskal autore… bururatzen zaizuen zer horri buruzkoa! Garrantzitsuena litzateke nork bere barruan dugun jakintza apurtxo hori partekatzea eta denon eskura ipintzea, denok denongandik ikasi ahal izateko. Zer iruditzen?

Bueno, bada, erronka orain zuena da. Hauxe litzateke proposamena eta jarraitu beharreko prozedura:

• Gai bat (literatura, zinema, musika, Internet, kirola, opera, Reala…) eta urrats bat (1. urratsa, 2. urratsa, 3. urratsa) hautatu.
• Atik Zra bitarteko hitzak eta definizioak prestatu.
• Formulario hau bete edo korreoz bidali (euskaljakintza, Gmail.com-en)

Hortik aurrera nire kontu. Jasotako guztiak Hitzapasa formatura egokituko ditut eta sarean, denon eskura, ipiniko ditut ahalik eta azkarren. Inork aurrera egingo?