Category

Aspaldi nuen buruan euskal esamolde, atsotitz, eta antzekoekin Gaurko hitza-ren antzeko zerbait egitea, baina beti atzeratu eta atzeratu ibili naiz, bi aldiz pentsatu arte zein formatu eta ostatu eman. Azkenean, duela aste batzuk Tumblr bat zabaldu nuen, horixe izango zelakoan, maiztasunez eta gehiegi nahastu gabe, edukia argitaratzeko modurik egokiena. Nolanahi ere, ekarpen gutxi batzuen ondoren jarraipena izan dezakeen egitasmoa dela ohartuta -eta nahasteko dudan nire joera naturalari tinko eutsiz-, atzo bertan domeinua erosi (esaerajatorrak.com) eta blog berriari ekin nion.

Zer topatuko dugu esaerajatorrak.com-en? Ezjakintasunagatik edo inguruko hizkuntzen eragina nabarmenegia izateagatik, maiz beste hizkuntza batzuetatik egiten dugu tira lokuzio, esaera, esamolde edo atsotitzak erabiltzeko orduan. Bada, txoko honen helburua hain ezagunak diren atsotitz edo lokuzio horiek euskara jatorrera ekartzea izango da, ahal den neurrian hizkuntza ezberdinetako ordainak eta adibideren bat edo beste emanez. Ikusten duzuenez, hasieran, behintzat, ez da asmoa ur sakonegietan sartzea (analizatzea nondik datozen esaera horiek…); halere, ateak zabalik geratzen dira balizko aldaketak txertatzen joateko.

Amaitzeko, harpidetza egiteko aukera dago, bai korreoz (gunean bertan topatuko duzue, eskuineko menuan) eta bai RSS helbide honetan: http://feeds.feedburner.com/EsaeraJatorrak

 

Dakizuen bezala, duela gutxi ospatu dugu Gaurko Hitzaren 4. urteurrena. 4 urte igaro dira, beraz, blogarekin hasi ginenetik. Tarte horretan, blogaren harira, egitasmo ezberdinak abian ipintzeko aukera izan dugu, besteak beste, bertan azaltzen diren hitzak praktikatzeko Gaurko hitza jokoa. Ez dago zalantzarik, horrelako jokoetan arituta, asko ikasten dela modu entretenigarrian eta ia ohartzeke; hala ere, hori motz samar geratzen zela eta, aspalditik nuen bide horretan beste urrats bat emateko gogoa. Gaurko hitza plataforma dator, nolabait, buruan nuen ideia hori gauzatzera; izan ere, plataformak aukera ematen baitu nork bere jokoak sor ditzan.

Tresna hau bereziki irakasle eta ikasleentzat pentsatutakoa bada ere, edonork egin dezake kontua bertan eta jokoak sortu. Egitasmoa abian ipintzeko orduan, ondorengoak izan dira helburu nagusiak:

• Irakasleek ikasleentzat ariketa moduko jokoak sortzea, gai bat errepasatzeko edo.
• Adin bateko ikasleek ere gauza bera egitea, ikasleak sortzaile eta, aldi berean, irakasle bihurtuz. Gainera, sortzen dituzten jokoak Tuenti, Twitter edo nahiago duten sareetan parteka ditzakete. Horrela, euren lagun, guraso, irakasle edo nornahiri jokatzeko aukera eman diezaiekete.
• Interneteko euskarazko edukiak areagotzea.

Esan behar da plataforma Forma 3.0 enpresak -duela gutxi arte Ihardun- garatutakoa dela eta HPSk diruz lagundua. Adibide honetan ikus dezakezuen bezala, test moduko joko edo ariketak sortzeko aukera ematen du eta, aipatu lez, sortutakoa sare sozial ezberdinetan partekatu ahal izango da (Tuenti, Twitter, Facebook eta Google+) eta baita korreoz bidali ere. Azken aukera, irakasle edota ikasleentzat interesgarria izan daitekeena, ‘enbotatu’ edo nork bere web orrian, gelako zein ikastetxeko blogean txertatzearena da.

Joko bat egin nahi duenak plataforman alta eman eta 15 galdera sortu beharko ditu. Nahi adina joko sortzeko aukera izango du erabiltzaile orok eta sortutako guztiak bere profilean gordeta geratuko zaizkio. Erabiltzaile ezberdinei jarraitzeko aukera ere egongo da. Eman beharreko urrats guztiak ondorengo bideotutorialean ikus ditzakezue (hementxe jarraibideak idatzita).

Espero dut Gaurko hitza plataforma zuen gustukoa izatea, eta guztion artean sortutako jokoetatik denok asko ikasi ahal izatea.

Aste honetan, mila kontu direla medio, ezin izan dut orain arte aurreko Amarauneko saioaren berri eman; halere, berandu bada ere, hementxe doa. Horrekin batera, Taosa irratsaiora ere gonbidatu ninduten ostegunean eta; ostiralean, berriz,  Berria TBn izan nintzen Haritz Rodriguezekin batera sare sozialei buruz hitz egiten, Urtzi Urkizuk gonbidatuta. A ze astea!!

Berria TBn:

Atzo Euskadi Irratiko Amarauna saioan,  Mikel Iturria, Gorka Julio eta hirurok egon ginen Edurne Ayuso eta Andoni Mutiloarekin batera, Donostiako EITBko estudioetan.  Ondorengo gaiak izan genituen hizpide:

• Wifia espazio publikoetan eta guifi.net proiektua
• SOPA (Stop Online Piracy Act)
• Infografia
• SOPA modu errazean azalduta
• Twitter euskaratzeko 2. kanpaina

Zuzenean entzuteko aukera izan ez zenutenoi hementxe uzten dizuet saioaren grabazioa. Osorik entzuteko, egin klik: