Mondragon Unibertsitateko online taldean nagoenetik, Moodle plataformarekin harreman oso estua dut; izan ere, nire zereginetako bat fakultate ezberdinetako irakasleen online formazioa da, eta unibertsitatean horixe da erabiltzen dugun plataforma, bai gure online ikastaroak garatzeko eta baita gure aurrez aurreko irakasgaiak osatzeko ere.

Moodle eta Web 2.0 tresnen arteko  integrazioa da gure helburuetako bat eta, bide horretan, Iñaki Larrea (@ilarrea) lankideak eta biok ikastaro bat garatu dugu gure irakasleak online irakaskuntzan trebatzeko asmoz: Curso para la  Formación de profesores online: metodologías activas e integración de herramientas 2.0 en Moodle. Ikastaroa Berlinen, Online Educa Berlin 2011n, eta MoodleMoot Spain 2011 Donostian aurkezteko luxuzko aukera izan dut (aurkezpenetako bat streaming bidez bota zuten eta grabatuta dago; beraz, beste batean ipiniko dut hemen, online formazioan edo Moodle plataforman interesatuta egonez gero, ikusi ahal izateko).

Gaur, dena den, duela aste batzuk Donostian ospatutako MoodleMootean (Moodle Plataformaren erabiltzaile, garatzaile, administratzaile, eta abarren topaketa) ezagututako Joyce Seitzinger-en Moodle Tool Guide for Teachers delakoaz hitz egin nahi dizuet. Moddle erabiltzen hasten diren irakasleak askotan galduta ibiltzen dira, ez baita erraza  helburu jakin baterako zein tresna erabil daitekeen jakitea hasiberritan. Joycek taula interesgarri bat garatu du zeinetan alor teknikoa eta pedagogikoa elkartzen dituen. Zer lortu nahi duzu? Bada, horretarako tresna jakin hau egokiagoa da beste hura baino. Horixe da azken finean taulak eskaintzen diguna. Taula ezagutu nuenean, oso interesgarria iruditu eta euskaratzeko dudan materialaren karpetan sartu nuen, eta hortxe nuen ea tartea noiz hartuko nuen zain.

Baina ez zen geratu hor kontua. Bizitzak, zoriak edo nik zer dakit zerk  Joyce  aurrez aurre ezagutzeko aukera eman zidan aipatutako jardunaldietan. Bere hitzaldia entzuten ari nintzela, eta geroago berarekin hitz egiten, konturatu nintzen  Australian bizi ala Ordizian, zer gertu egon daitezkeen bi pertsona: juxtu-juxtu gai eta interes berdintsuen inguruan mugitzen gara eta lan egiten dugu. Bide batez, eskerrak eman nahi dizkiot Joyceri ez bakarrik egiten ari den lanagatik, baita Australiara gonbidatzeagatik ere!

Kontuak kontu, hementxe dago bere  ‘Moodle Tool guide for Teachers’ ezaguna euskarara itzulia. Beti bezala, eskertuko nizueke edozein akats ikusten baduzue edo zerbait ez dela ondo ulertzen iruditzen bazaizue,  jakinaraztea.

Egin klik irudiaren gainean, jatorrizko neurrian ikusteko edo jaisteko.

10 consejos para el uso de las TIC en clase infografia interesgarria ezagutu nuen aurrekoan, Twitterren, @alfredovela erabiltzailearen bitartez. Aholkuak zentzuzkoak eta  jarraitzeko modukoak iruditu zitzaizkidan eta, beraz, infografia euskaratzeari ekin nion. Informazio eta Komunikazio Teknologiak ikasgelan txertatu  nahi duen edozein irakasleri -edo irakasle izan nahi duenari-ondo etorriko zaizkiolakoan, hementxe uzten dut euskaratuta Sergi Martín Cabezak atondutako infografia.

Itzulpenean akatsen bat antzeman edota euskaraz egokiago esan daitekeela iruditzen bazaizue, ongi etorriak izango dira, beti bezala, zuen aholku eta iradokizunak.

Atal berria: infografiak euskaraz

Datu pilaketa eta gaindosi garai hauetan, datu horien bisualizazioari arreta berezia ipini behar zaiola pentsatzen duen horietakoa nauzue. Datuak hortxe ditugu, informazioa hortxe daukagu… gure eskura, klik batera; halere, hori ez da askotan nahikoa eduki horiek interpretatzen jakiteko. Datuak, informazioa… modu erakargarrian, zehatzean, errazean, argian, gardenean edo, hitz bitan esanda, edonork ulertzeko moduan ematea da maiz erronka, lehen esan bezala, horrenbesteko pilaketa dagoen garaiotan.

Zorionez, azkenaldian, datuen ugaltzearekin batera, haiek bistaratzeko moduak ere areagotzen ari dira, eta horren adibide dira han eta hemen edozer azaltzeko -eta edozer esanda, edozer esan nahi dut- topa ditzakegun infografiak. Ez dago esan beharrik hezkuntzan erabiltzeko itzelak izan daitezkeela. Bada, aurrekoan, infografia interesgarri bat topatu eta itzuli nuen: Creative Commons umeei azaldua. Hori egiteko, Gimp aplikazioa instalatu eta nire lehen urratsak ematen hasi nintzen. Programarekiko beldurrak uxatuta eta hainbat infografia euskaraz izatea baliagarria izan litekeela iritzita, atal berri bat estreinatzeari ekingo diot: INFOGRAFIAK EUSKARAZ.

‘Web 2.0ren egitura’ infografia euskaraz

Atala estreinatzeko, web 2.0ren inguruko infografia bat hautatu dut. Ematen ditudan ikastaro eta hitzaldietan, Web 2.0 kontzeptua azaltzeko, askok ezagutzen ditugun Web 2.0ri buruzko infografia hauek erabili izan ditut (Mapa visual de la Web 2.0 eta Web 2.0 map). Edonola ere, aurrekoan Alfredo Velari esker, Josep Claret kontsultoreak egindako beste honen berri izan nuen: Estructura de la Web 2.0. Asko gustatu zitzaidan, aurrekoetan aipatzen ez diren hainbat kontzeptu berri azaltzen direlako. Gauzak horrela, eta egilearen baimena infografia euskaratzeko lortu ondoren -originalaren CC lizentziak ez du lan eratorririk onartzen-, euskaratzeari ekin nion. Josep Clareti eskerrak eman nahi dizkiot, baimena emateaz gain, jatorrizko bertsioan erabilitako artxibo guzti-guztiak nirekin partekatzeagatik.

Hementxe uzten dut atal berriari hasiera emango dion infografia, Web 2.0ren egitura, norbaiti baliagarria irudituko zaiolakoan. Egin klik irudiaren gainean, jatorrizko neurrian ikusteko:

Itzulpenaren inguruan

Dakizuen bezala, web 2.0ren inguruko terminologia ez dago oraindik araututa; beraz, edozein zuzenketa edo iradokizun ongi etorria izango da.

Gaur goizean Twitterren, @Txente -ren tuit honen bidez, ¿Qué es Creative Commons? infografia interesgarriarekin egin dut topo (originala, portugesez, nerdson.com gunean topa dezakegu.

Azalpena oso garbia iruditu zait, eta euskaratzeari ekin diot ikasleekin erabiltzeko asmoz. Beraz, autoreak berak ematen duen baimena tarteko, hementxe uzten dut euskarazko bertsioa, ondo badatorkizue, zuek ere erabil dezazuen.

Eguneraketa (2011-04-06): Txopik erantzunetan hainbat zuzenketa utzi ondoren, infografia eguneratu dut. Hementxe uzten dizuet behin betiko bertsioa:

Jatorrizkoa: CC Aitortu © cc-by: Karlisson Bezerra, Nerdson / Itzulpena: Maite Goñi

Informazio gehigarria:

• Creative Commons legal code (euskaraz)
• Creative Commons education