Egunek abiadura bizian egiten dute aurrera, eta ia-ia ohartu gabe iritsi zaigu Gaurko Hitzaren 3. urteurrena ospatzeko eguna. Iaz laguntza eskatu nizuen 2. urteurrena ospatzeko. Gogoratzen? Zuen gustuko hitza aukeratu, bideo bat atondu eta youtube-ra igo. Horixe izan zen iaz eskatutakoa. Arrakastatsua eta emankorra izan zen eskea, zalantzarik gabe; izan ere, denon artean 84 bideo/hitz grabatzea lortu baikenituen. Gaurko hitzaren kanalean dituzue denak ikusgai.

Aurten, eskatu beharrean, eman egin nahi nuke; beraz, lagun batzuekin batera, topaketa bat antolatu dugu. Bertan nahiko genuke gurekin egotea Gaurko Hitzaren lagunak eta, batez ere, iaz zuen denbora eskuzabaltasunez eskaini zeniguten guztiak.

Ez gara xehetasun handitan sartuko oraingoz,  baina kontuan hartu ondorengoak:

• Ekitaldia: Gaurko Hitzaren 3. urteurrena ospatzeko topaketa.
• Noiz: azaroaren 2an, iluntzeko 19:30ean,
• Non: Donostian, DOKAn (bertako Kafe Antzokian).

3. urteurrena denez, ospakizunean izango ditugun hiru artistaren izenak aurreratuko dizkizuet gaurkoan: Anari, Iban del Campo eta Harkaitz Cano. Gehiago izango dira.

Datozen egunetan joango gara egitarau osoa zehazten, baina, oraingoz, hauxe da guztia. Jakinaren gainean zaudete; beraz, gorde eguna zuen agendetan!

Atzo UEUren 2010-2011 ikasturte irekiera ekitaldia egin zen Eibarko Ikastetxe Nagusian.  Bertan, UZTARO Giza eta Gizarte Zientzien aldizkariaren 20. urteurrena ospatu zen Iban Zaldua idazle eta historialariaren hitzaldi batekin. Zoritxarrez, azken momentuko baja izan zen Iban, eta Gidor Bilbaok hartu zuen hitza Ibanek prestatutako hitzaldian “actio” lanak eginez. Benetan interesgarria Zalduak atondutako hitzaldia non historia, umorea eta beste hainbat kontu nahasten ziren.

Hitzaldi labur honetan, Iban Zaldua idazleak, UZTARO Giza eta Gizarte zientzien aldizkariari gorazarre egin ondoren bere hogeigarren urteurrenean, traizio egingo die bere laudorioen terminoei eta, UZTAROri horren ondo egokitzen zaion zientifikotasunaren arauei itzuri eginez (baina urteurrenen gai orokorrari helduz), 1512ko Nafarroaren Konkistaren ospakizunen komenientziaren inguruko bere zalantzak aurkeztuko ditu, eta, kritikak egitea bestelako aukerabiderik eman gabe itsusia dela jakitun, ospakizun horiek ordezkatzeko balizko proposamen alternatibo bat aurkezten saiatuko da. UEUk zuzendari berria aurkeztuko du biharko ikasturte hasiera ekitaldian, Unibertsitatea.net (10-10-21)

Horren aurretik, Uztaro aldizkariaren zuzendari den Jokin Apalategik, urte hauetan aldizkaria josten ibilitako kideen aipamena egiteaz gain, 20 urte hauetan izandako anekdotak, bizipenak eta beste hainbat ekarri zituen gogora.

Era berean, ekitaldi hau baliatu zen UEUren Zuzendari berriaren aurkezpen ofiziala egiteko. Zehatzago izateko, aldez aurretik bazkideek izandako batzarrean hautatu zen erakundearen buru berria. Lore Erriondok, 5 urte eta erdiz zuzendari aritu ostean, kargua utzi eta lekukoa aspalditik UEUn bertan aritutako Karmele Artetxe historialari eta ikertzaileari eman zion. Izendapena Sustatun, Berrian eta Diariovasco.com-en, besteak beste, jasota dago.

Amaitzeko, pintxoak eta hartu-eman polita izan genuen bertaratu ginenon artean. Hau guztia Eibarko Isasi-Markeskoa jauretxean gertatu zen, autoritate, lagun eta, batez ere, UEUko kideak lekuko zirela.

Aurreko astean, Free Software Foundation Europe elkarteko Karsten Gerloff presidentea eta Rainer Karsten idazkaria ezagutu genituen. Uztailaren 13an, Donostian, izan zen lehenengo hitzordua Kaskazuri jatetxean. Bertan, Mikel Olasagasti, Gorka Julio, Luistxo Fernandez eta laurok abagune ezin hobea izan genuen, ederki afaltzeaz gain, euren ahotik Europan zehar software librearen inguruan egiten ari dena ezagutzeko. Hemengo egoeraren errepasoa ere egin genuen, librezale.org eta Esle egiten ari direna komentatu eta aurrera begira egin daitekeenaz ere luze hitz egin genuen. Hezkuntzaren oinarrietatik hasi eta administrazioaren azken muturretara iristea ezinbestekoa dela garbi geratu zen. Interesgarria benetan hitz egindako guztia eta oso atseginak tratuan Karsten eta Rainer alemanak.

Gerloff eta biok Kaskazurin

Bi egun beranduago, Zamudioko Teknologi Elkartegian, Bizkaia Enpresa Digitalak antolatutako Software Libre en la administración europea hitzaldian izan nintzen. Asko gustatu zitzaidan nola aurkeztu zuen gaia FSFEko presidenteak, arrazoi garbiak eta adibide zehatzak emanez, eta, bide batez, asko poztu ninduen aretoa beterik ikusteak. Kontuan izanda administrazioaz eta software askeaz aritu zela, gauzak aldatzen ari diren seinale. Postaz  eskatuta, Gerloffek hitzaldian erabilitako aurkezpena bidali zidan. Esan zidan Brasiliara zihoala zuzenean eta ez bazion denborarik ematen Euskal Herrian izandako bisitari buruz idazteko aste honetan, nik argitaratzeko aurkezpena. Gaur ikusi dut bere bisitari buruzko kronika argiratatu duela (beheraxeago dago esteka). Gauzatxo bat argitu nahi dut, dena den. Bere kronikan aipatzen du, niri erreferentzia eginez, bere eskola software librera arrakastaz migratu duen irakasle baten esperientzia entzuteko aukera izan zuela. Gure ikastolan software askeari buruz egindako lan guztia, eta ez da gutxi izan, gure IKT dinamizatzaileari zor diogu. Nire jarduna besteen aurrean nire konbentzimendua garbi uztera eta, ahal izan dudan neurri txikian, arazoen aurrean laguntzera mugatu da. Bakoitzari berea.

Hementxe Gerloffek Zamudion erabilitako aurkezpena:

Bienvenidos al mainstream!

Esan beharra dago, Gerloffek gure artean emandako astean, agenda bete-betea izan zuela. Hementxe uzten dizkizuet Gerloffek izandako bilera, topaketa eta hitzaldien kronikak. Batetik, berak idatzitakoa; bestetik, egunotan fin-fin berarekin atzera eta aurrera ibili den Mikel Olasagastik Gaur8n argitaratua.

• A free software week in the Basque Country, Karsten Gerloff
• FSFren bisita, Mikel Olasagasti (Gaur8)

Informazio gehigarria:

• El software libre es una estrategia de desarrollo social y económico (Euskadi+innova)
• Las claves del software libre de la mano de Karsten Gerloff (eitb.com)
• Boulevard magazinean Gerloffi egindako elkarrizketa (eitb.com)

Atzo Elgetako Espaloia Kafe Antzokian izan ginen Euskovision delakoa Sustaturekin komentatzen. Ekitaldi honen inguruko informazioa Sustatun bertan duzue, baina, labur esateko, honetan datza: Eurovision jaialdia pantaila handi batean ikusi bitartean, Coveritlive bidez komentatzea. Asmatuko zenuten bezala, ez dira iruzkin profesionalak, Uribarri baikinan, ez; kontua bertan gertatzen den edozer umorez komentatzea da.

Taldetxo bat (Iban Arantzabal, Goio Arana, Josu Mendicute, Orreaga Aranburu, Elena Laka, Jon Berezibar -barkatu baina pare baten izenak ez dakizkit-) bildu ginen atzo Luistxo Fernández, Ana Malagón eta Goio Telletxea aparten gidaritzapean. Ez dago esan beharrik ederki baino hobeto pasatu genuela: batak ez dakit nola zeukala ilea eta barrez, bestearen izterrak sekulakoak zirela eta barrez… Burutik pasatu zitzaigun guztia idatzi genuen! Aitortu beharrean nago hara joan aurretik entzun gabe nituela sailkatutako abestiak, eta ez nuela ideiarik ere aurretik gertatutakoaz, baina garbi geratu zen maila handia zegoela bertaratutakoen artean. Sustatuk egun batzuk lehenago parte hartzeko deia egina zuenez, gainera, hortxe egon ziren komentarista gehiago sareaz bestaldean gurekin batera.

Momentu bereziki barregarriak izan genituen: espontaneoa agertu zenean, ilehori hau ikusi genuenean, bozketa garaian herrialde ezberdinetako aurkezleak ateratzean, Uribarrik “xarrr de momen” esaten zuen bakoitzean… Haserretu ere, haserretu ginen pixka bat irabazlearekin (Germany twelve points!), ez baitzitzaigun irabazteko moduko abestia iruditu eta, behin kritikatzen hasita, puntuatzeko modu berriarekin freskotasuna eta zirrara apur bat galtzen dela iruditu zitzaidan…

Aurreko guztiaz gain, garbi dago nire gustu musikala oso urrun dagoela herrialde ezberdinetako ordezkarien faboritismoetatik. Nik ez nuen bat bera ere asmatu; halere, norbaitek irabaztekotan, nik hauei emango nieke saria:

Gauza hauek, hotzean eta testuingurutik at, bitxi samarrak gera daitezke; halere, hementxe klik eginda, han hitz egindakoari begitxo bat botatzeko aukera izango duzue. Ez ginen, baina, bakarrak izan horrelako kontuetan. EurOut ere (Europa osora begira egindako lesbianentzako webgune bat) liveblogging egiten ibili zen gure antzera. Luistxo bi taldeon jarduna errepasatzen egon da eta, antza denez, iruzkin berberak egin genituen. Harrigarria benetan konparazioa!

Amaitzeko, esan, gutako batzuk (Ana, Goio, Orreaga eta ni)  Elgetan geratu ginela argazkiko Eguzkitza landetxean. Plazer bat izan da gaurko gosaria, konpainia ezin hobean!!