Begi bistakoa da hezkuntzan gero eta gehiago erabiltzen ditugula bideoak (Flipped Classroom metodologian, MOOCetan, online ikastaroetan eta baita aurrez aurreko eskoletan ere). Hori, zalantzarik gabe, horrela da. Eta gainera, helburu didaktikoaren arabera, bideo mota ezberdinak graba ditzakegu: screencast delakoa (pantailan ikusten dena azalduz), aurkezpen narratuak (sortuta ditugun aurkezpenei ahotsa ipiniz), arbel aurreko argibideak edo, besterik gabe, edozein azalpen emateko erabiltzen ditugunak (ikastaro baten hasierako argibideak emanez, kontzepturen bat azaldu nahi dugunean…). Bada, azken hauek grabatzeko, beti oso interesgarriak iruditu izan zaizkit Teleprompterrak, hau da, telebistako aurkezleek erabiltzen dituzten gailu horiek, non esan beharreko testua irakur daitekeen.

Zenbatetan ez gara kamera baten aurrean ipini, eta behin eta berriz errepikatu esan beharreko testua? Denbora galtze hori saihesteko, oso erabilgarriak iruditu zaizkit beti telepromterrak. Agian, freskotasuna ken dezakete (irakurtzeko gaitasuna eta urduritasunaren baitan), baina, aldi berean, harira joatea errazten du. Eta aintzat hartuta gaur egun denbora altxor preziatu bat dela, ez zaizkigu gaizki etortzen horrelako laguntzak. Gainera, ikasleen sorkuntza eta ekimena sustatu nahian metodologia aktiboak erabiltzen ditugun irakasleok gero eta gehiago eskatzen diegu bideoak sor ditzaten. Bada, helburuaren baitan, haientzat ere oso erabilgarriak izan daitezke telepromterrak.

Duela urte batzuk Online Educa Berlin kongresuan irakaskuntzarako bideoak grabatzeko telepromter bat ikusi nuenetik, beti izan dut horietako bat erosteko gogoa, baina gauza bat dela eta bestea (prezioa, konplexutasun teknikoa…), azkenean gaur arte…

Zertara dator, baina, sarrera hau guztia? Bada, aurrekoan, Big Vu aplikazioa ezagutu nuen eta gaur izan dut probatzeko aukera. Badaude antzeko beste aplikazio batzuk (Teleprompter, Selvi…), baina hau erraza eta oso praktikoa iruditu zait: kontua sortu, gidoiaren atalean irakurri nahi den testua idatzi edo kopiatu eta bideoa grabatu. Erraza, ezta?

Abian ipintzeko laguntza behar baduzue, hementxe tutorialtxo bat: