Zeintzuk dira egungo ikasle zein irakasle batek izan beharko lituzkeen gaitasun digitalak? Horiek antzeman nahian ibili naiz azkenaldi honetan eta esan behar da zerrenda luze bezain interesgarria ateratzen dela. Beste batean itzuliko naiz gai honetara, baina, gauzak diren bezala, horrekin tematuta ibili naiz uda osoan zehar. Burutazio horien emaitza izan da alfabetizazio digitala lantzeko hainbat ikastaro labur. Hementxe uzten dizuet horietako bat: Bilaketak egiteko gaitasuna lantzeko ikastaroa.

Ikasleek -eta irakasleok- informazio mugagabea dute eskura Interneten, baina ba al dakite nola egin bilaketak modu eraginkorrean? Topatutako emaitzak eta informazio iturriak modu kritikoan balioesteko gai al dira?

Zertan datza, baina, bilaketak egiteko gaitasuna? Labur esateko, besteak beste, gai izan beharko genuke:

• bilaketak modu eraginkorrean egiteko
• zein informazio dagoen/ez dagoen erabilgarri jakiteko
• taktika bat garatzeko (helburu zehatz bat lortzearren)
• estrategia bat garatzeko (bilaketa sakonagoak antolatzearren)
• topatutako edukia balioesteko

Ikastaro labur honetan, ondorengoa topatuko duzue:

• Aholku eta trikimailuak, Google Search erabiliz, bilaketak egiteko gaitasuna garatzeko/hobetzeko.
• Topatutako informazioa eta iturriak balioesteko gaitasuna garatzeko laguntza.
• Google Seach bilatzailearen erabilera pedagogikorako ideiak.
• Esteka interesgarriak
• Sakontze ikastaroak
• Gidak
• …

Batez ere, Google Search bilatzaileari begira garatutako ikastaroa izan da, erabiliena delako. Nolanahi ere, ez dugu ahaztu behar badaudela bilatzaile gehiago. Niri, batik bat, edukia artatzeko guneetan daudenak interesatzen zaizkit (Diigo, Scoop.it, Pinterest…), informazioa etiketatuta eta iragazita ematen dutelako (balio erantsi askoz ere handiagoa emanez bilaketari), baina hori beste baterako utziko dugu. Bestalde, hizkuntza ezarpenak aldatzen joan naiz adibideak ipintzeko (ingelesez, euskaraz, gaztelaniaz…), euskaraz ez daudelako ezaugarri guztiak erabilgarri oraindik. Kontuan izan, Googlen hautatua duzuen hizkuntzaren baitan, trikimailu batzuk erabili ahal izango dituzuela eta beste batzuk ez. Ingelesez, noski, dena dago erabilgarri.