Aurrekoan, Gorka Julio (@teketen) eta biok Mondragon Unibertsitateak eskaintzen duen Euskal Kulturgintzaren Transmisioa aditu tituluko saio batera gonbidatu gintuzten. Oso gustura onartu genuen 3. edizio honetan parte hartzeko gonbidapena -are gehiago gure lagun Patxi Gaztelumendik graduondokoari eskaini dion ekultura.net blogean idatzitako hitzak irakurri ondoren-, eta hantxe izan ginen kontu kontari bakoitza ordu pare batez.

Jende interesgarri mordo batek hartu du parte aurtengo edizioan. Gai anitzak eta hainbat zaletasun ezberdin, baina pasio partekatu bat: euskara.

Ikasturte honetan ere jarraipen estua egin zaio medio ezberdinetatik EKTri: Joanes Imaz kazetariak irratsaio bereziak prestatu ditu Julian Belokik aurkezten duen Jakin minez irratsaiorako, eitb.com webgunearen barruan orri bat eskaini zaio graduondoari, Patxi Gaztelumendiren jarraipena aipatutako ekultura.net blogean, Berria.tb-n laburpen bideo guztiak daude ikusgai eta Berria egunkarian asteartero Beñat Gaztelumendiren kronika argitaratu dute.

Banuen asmoa honi buruz lehenago hitz egiteko; halere, gauza bat dela eta bestea, azkenean, egitekoen zerrenda luzean geratuta zegoen gaur Agirregabiriak eta Rober Gutiérrezek tuit banatan gure parte hartzea gogorarazi didaten arte. Beraz, handik eta hemendik aterata, hementxe uzten ditut gure saioen laburpenak eta irratirako egindako elkarrizketak:

Bideoa:

Irratsaioa

Gaur, Euskadi Irratiko Amarauna saioan,  Mikel Iturria (@iturri), Goio Telletxea (@maxkuri)  eta hirurok egon gara Arantxa Artza eta Andoni Mutiloarekin batera, Donostiako EITBko estudioetan. Ondorengo gaiak izan ditugu hizpide:

• NBEk internet sarbidea giza eskubidea dela erabaki du
• Streaming bidez jarraitu ahal izan zen atzo hainbat udalen osaketa, baita #udalak etiketaren bidez ere.
• Weiner kongresistaren auzia. Adi sare sozialetan trukatzen denarekin!
• Applek keynote berri bat eta merkatua aztoratu du beste behin aurkeztutako berritasunekin. Dropbox, Instapaper eta Whatsapp bezalako aplikazio ezagunek eskaintzen dituzten funtzionalitateetako asko gehitu dizkiote beraien aparailuei.
• Microsoftek eta Eusko Jaurlaritzak bihar aurkeztuko dute enpresaren ofimatika pakete euskaldundua. Donostian izango da, San Telmo Museoan

Saioa entzun nahi baduzu:

Datorren astezkenetik ostiralera Tknika Lanbide Heziketarako berrikuntza zentroak bere egoitzan ospatuko den berrikuntza jardunaldietara joateko gonbitea luzatu du. Hiru egun horietan zehar denetarik ikusi, ikasi eta entzuteko aukera izango da; izan ere, programa oso zabala baita. Ni ere hantxe izango naiz, ostiralean. Tknikakoek PLE (Personal Learning Environment) delakoari buruzko aurkezpena egitea eskatu didate eta horri buruz mintzatuko naiz. Nire ekarpena “Gela birtualetik ikasketa ingurune pertsonalizatuetara” izango da.

Norbaiten interesekoa izango delakoan, hementxe uzten dut antolatzaileek zabaldu duten gonbidapena:

Tknikak berrikuntza esperientzia bikainak ezagutzera gonbidatzen zaitu. Jardunaldi hauetan, teknologiaren, irakaskuntzaren eta kudeaketaren alorrean Lanbide Heziketaren berrikuntza bultzatzeko gakoak emango dizkigute punta-puntako hizlariek.

Ezagutu ezazu 3 egun hauetako hitzaldi eta tailerren programa zabala eta  aukera ezazu interesgarriena iruditzen zaizuna.

1. jardunaldia, ekainak 15: “Berrikuntza Irekia”.
2. jardunaldia, ekainak 16: “Iraunkortasun Teknologikoa”.
3. jardunaldia, ekainak 17: “Ikaskuntza zirikatzen”.

• Edukiera mugatua. Jardunaldietan izen-emateko, sakatu HEMEN.
• Jardunaldien programa osoa ikusteko, sakatu HEMEN. [pdf]

Gipuzkoako Foru Aldundiaren Berrikuntzako eta Jakintzaren Gizarteko Departamentuak beste ikastaro bat ipini du sarean, denon eskura, Internet eta bere tresnen erabilera gipuzkoarron artean sustatzeko. Duela hilabete batzuk Twitter ikastaroa plazaratu zuten, eta hementxe ipini genuen: Oinarrizko Twitter ikastaroak, euskaraz eta gaztelaniaz. Orain mapa mentalena garatu dute.

Mapa mentalen oinarrizko ikastaroa

Ondorengo atalak ditu ikastaroak:

• Zer dira? (01:28)
• Zertarako balio dute? (02:04)
• Nola sortzen dira? (01:59)
• Tresna digitalak (00:58)
• Aplikazio profesionalak (03:56)
• Agurra eta balorazioa (00:49)

Atal guztiek bideoa dute, azpitituluekin, eta azalpenen eskuliburu osoa pdf formatuan jaisteko aukera ere badago. Ikastaroa euskaraz eta gaztelaniaz egin daiteke:

• Mapa mentalen oinarrizko ikastaroa euskaraz
• Curso básico de mapas mentales

Ikastaroa TAK enpresak garatu du. Esan beharra dago, Twitter ikastaroarekin gertatu zen bezala, ikastaro honetako bideoak ere ezin direla edozein gunetan txertatu; hau da, ez dago embed egiteko aukerarik. Aurrekoan adierazi genien eta kodea pasatu ziguten arazorik gabe. Halaber, esan ziguten hurrengoan kontuan izango zutela aukera hori. Antza denez, ez dira gogoratu. Ez dago zalantzarik askoz ere interesgarriagoa litzatekeela bideoak nonahi txertatzeko aukera emango balute.

Bide batez, harrituta jarraitzen dut ikastaro honetan ere Copyright-a ikustearekin; izan ere, jakina baita Gipuzkoako Foru Aldundia ahalegin berezia egiten ari dela euren materialak eta fondoak denon eskura uzteko, Creative Commons lizentziapean (GureGipuzkoa.net…). Ea hurrengoetarako.

Amaitzeko, eskerrak eman baino ez honelako ikastaroak garatzeagatik, oso ondo etortzen baitzaizkigu batzuoi gure ikasleekin erabiltzeko eta beste batzuei alor honetan abian ipintzeko.

Ikastaro honen berri, nola ez, Twitterren izan zuen, zehazki @maixu21 erabiltzailearengandik. Mila esker, Xabier, honen berri emateagatik!

Pixka bat berandu bada ere, hementxe uzten dizkizuet joan den igandeko Euskadi Irratiko Amarauna saioan hitz egindakoa eta bertan hizpide izan genituen gaien erreferentzia eta helbideak. Gorka Julio (@teketen), Ana Malagon ( @pravdatxiki ) eta hirurok izan ginen Edurne Ayusorekin batera, Donostiako EITBko estudioetan. Ondorengo gaiei eman genien errepaso azkarra:

• Apadrina un pepino ekimena.
• Maiatzaren 15eko ekimena (#acampadadonostia ) eta plazan.net: Donostiako asanbladaren asmoen, erabakien eta ekintzen jarraipena, besteak beste, egiteko webgunea.
• Sarea eta hiztegi digitalak: Euskalterm berritua (Argian eta Sustatun).
• Twitterreko bilatzailea berritua. Orain Twitterren bilaketa bat egitean, aldameneko barran “Display media” botoia topa dezakegu hainbat emaitzatan. Bertan klik eginez, bilaketaren terminoarekin erlazionatutako argazkiak eta bideoak topatu ahal izango ditugu.
• This guy has my MacBook edo ordenagailu eramangarri bat lapurtu zuenari gertatutakoa istorio bitxia, eramangarri horri arrastoa jarraitu ziotelako.

Saioa entzun nahi baduzu: