Atal berria: infografiak euskaraz

Datu pilaketa eta gaindosi garai hauetan, datu horien bisualizazioari arreta berezia ipini behar zaiola pentsatzen duen horietakoa nauzue. Datuak hortxe ditugu, informazioa hortxe daukagu… gure eskura, klik batera; halere, hori ez da askotan nahikoa eduki horiek interpretatzen jakiteko. Datuak, informazioa… modu erakargarrian, zehatzean, errazean, argian, gardenean edo, hitz bitan esanda, edonork ulertzeko moduan ematea da maiz erronka, lehen esan bezala, horrenbesteko pilaketa dagoen garaiotan.

Zorionez, azkenaldian, datuen ugaltzearekin batera, haiek bistaratzeko moduak ere areagotzen ari dira, eta horren adibide dira han eta hemen edozer azaltzeko -eta edozer esanda, edozer esan nahi dut- topa ditzakegun infografiak. Ez dago esan beharrik hezkuntzan erabiltzeko itzelak izan daitezkeela. Bada, aurrekoan, infografia interesgarri bat topatu eta itzuli nuen: Creative Commons umeei azaldua. Hori egiteko, Gimp aplikazioa instalatu eta nire lehen urratsak ematen hasi nintzen. Programarekiko beldurrak uxatuta eta hainbat infografia euskaraz izatea baliagarria izan litekeela iritzita, atal berri bat estreinatzeari ekingo diot: INFOGRAFIAK EUSKARAZ.

‘Web 2.0ren egitura’ infografia euskaraz

Atala estreinatzeko, web 2.0ren inguruko infografia bat hautatu dut. Ematen ditudan ikastaro eta hitzaldietan, Web 2.0 kontzeptua azaltzeko, askok ezagutzen ditugun Web 2.0ri buruzko infografia hauek erabili izan ditut (Mapa visual de la Web 2.0 eta Web 2.0 map). Edonola ere, aurrekoan Alfredo Velari esker, Josep Claret kontsultoreak egindako beste honen berri izan nuen: Estructura de la Web 2.0. Asko gustatu zitzaidan, aurrekoetan aipatzen ez diren hainbat kontzeptu berri azaltzen direlako. Gauzak horrela, eta egilearen baimena infografia euskaratzeko lortu ondoren -originalaren CC lizentziak ez du lan eratorririk onartzen-, euskaratzeari ekin nion. Josep Clareti eskerrak eman nahi dizkiot, baimena emateaz gain, jatorrizko bertsioan erabilitako artxibo guzti-guztiak nirekin partekatzeagatik.

Hementxe uzten dut atal berriari hasiera emango dion infografia, Web 2.0ren egitura, norbaiti baliagarria irudituko zaiolakoan. Egin klik irudiaren gainean, jatorrizko neurrian ikusteko:

Itzulpenaren inguruan

Dakizuen bezala, web 2.0ren inguruko terminologia ez dago oraindik araututa; beraz, edozein zuzenketa edo iradokizun ongi etorria izango da.

Lehengo astean, Diariovasco.com-ek antolatutako II Hiritar Digital Nazioarteko kongresuan izateko aukera izan nuen. Teknologiaren eragina politikan eta gobernaketan izan zen jorratutako gaia (ikus programa osoa eta Twitter #CICD haria). Ez nuen kongresuari buruz  idazteko asmorik, batez ere, denborarik izan ez dudalako patxadaz harri buruz hausnarketa egiteko, baina aurrekoan Luistxo Fernandezek Codesyntaxeko blogean (Reflexiones donostiarras tras un congreso de Ciudadanía Digital) eta Sustatun idatzitakoa (Donostiako Hiritar digitalen biltzarraren ostean hausnartzeko) irakurri ondoren, niri ere hainbat burutazio etorri eta Sustatun bota nituen erantzunetan. Hemen ere uzten ditut antolatu gabeko ohar batzuk baino ez diren hauek, nire txokoan ere jasota gera daitezen.

Luistxo, bi egun horietan zehar zurekin honetaz eta hartaz zuzenean hitz egiteko aukera izan banuen ere, komentatu nahi nizun erabat ados nagoela zuk hain garbi eta hain ondo azaldutakoarekin. Denetarik egon zen kongresuan, bi egunetako jardunaldietan gertatu ohi den bezala, baina orokorrean hitzaldien edukia, sakontasuna eta adierazteko modua maila altukoak zirela esango nuke. Ados nago, halaber, azpimarratzen dituzun hizlariekin, Yuri Morejon (Internet erabakigarria da hauteskundeak irabazteko) eta Antoni Gutiérrez-Rubíren (Alderdi politikoa egitura gisa IKTen garaian) ekarpenak bereziki interesgarriak iruditu zitzaizkidan. Azken honen artikulu hau gomendatuko nuke: “Elites desconectadas”.

Horretaz gain, hementxe doaz burura datozkidan hainbat ideia han entzundakoaren eta zuri irakurritakoaren haritik:

• Asko hitz egin da gobernutik datuen irekieraz, partaidetzaz, etab., denok parte hartu ezin dugun toki/egoera batean. Nahiko ironikoa iruditzen zait. E-government ugari, baina non geratzen da benetako e-governance delako hori? Ez nuen entzun hemengo adibiderik…
• Gardentasun lege baten beharra. Beste herrialde batzuekin konparatuta, eskas samar omen gabiltza horretan.
• Ez omen da gauza bera herritarroi entzutea edo guk, herritarrok, benetan entzunak garela sentitzea. Ados nago. Honek ere ekartzen du politikoenganako aipatutako “desafekzio” edo gaitzuste hori.
• Hauteskundeak irabazteko, politikoei botoa emateko… zirrara sentiarazi behar omen digute politikoek. Non gaude horretan? Noiz sentitu zenuen azken aldiz zirrara politiko bati entzutean?
• Kanpaina garaian erraza da politikoek (edo norbaitek beraien izenean) blog bat zabaltzea, Twitterren eta Facebooken kontua egitea… Azkenaldian, politiko asko ari da hori egiten. Baina zein da benetako asmoa, entzute aktibo bat egitea edo sare sozialetan egotea Obamaren kanpaina arrakastatsuaren sukarrak jota? (Twitter eta Facebooken kontua zabaltzen duten politikoak badira, gero prentsaurrekoetan galderarik onartzen ez dutenak…)
• Europako parlamentuaren presentzia sare sozialetan komentatu ziguten. Ondo, baina non geratzen da Twitterren (edo beste hainbat mediotan) europarlamentarioek jasotako astindua dieten kobratzea edo hegaldiak zein klasetan egiten dituzten gaiak direla eta? Nola kudeatzen dira sarean horrelakoak? Esan nahi dudana da aholku ugari eman zirela maila abstraktuan, baina gutxi hitz egin zela errealitatean gertatutako arazoen inguruko kudeaketaz. Egon badaude sare sozialetan, baina ba al da politikorik, partidurik…benetako entzute aktiboa egiten duenik bertan? Dena den, ez zait orokortzea gustatzen eta iruditzen zait inguruan ikus daitekeela aldea, sarean duten jokabideari dagokionez, batzuen eta besteen artean.
• Atril osteko politika ez omen da jada baliagarri. Eredurik garbiena Auzmendiren hitzaldian ikusi genuen. Twitterren irakurri ahal izan zen moduan (hainbatetan errespetu kaskarrez, dena esan beharra dago), ez forma ez edukia ez ziren, ez, egokiak izan. Mezua zabaltzeko, egun, denak ez du balio. Lastima politikari gehiagok ikusi ez izana bere aurkezpena; izan ere, nik uste baitut hitzaldi irakurriek -norberak edo beste norbaitek idatzitakoek, eta salbuespenak salbuespen- eta “bla-bla-bla”-ek gaur egun inor gutxi konbentzitzen dutela (aldez aurretik, politikariak hitza hartu baino lehen, jada konbentzituta dauden horiek izan ezik). Horretaz gain, erabat ados nago zurekin, Auzmendik ez zion kongresuaren gaiari heldu eta bere hitzak tokiz kanpo geratu ziren. Kongresuaren gaia teknologiaren eragina politikan eta gobernantzan izanik, HPSren egitasmoek –interesgarriak eta garrantzitsuak izan arren- ez zuten bat egiten kongresuaren helburuekin. Eta interesgarriak eta garrantzitsuak dira, nire uste apalean. Dakizun bezala lehen eskutik bizi dut hori eta nire ahalegin guztia egingo dut nabilen esparru mugatuan, IKTetan, horiek aurrera atera daitezen euskararen mesederako badira, baina egia da horiekin ez dela nahikoa eta, orokorrean, Administrazioaren burutik hasita, hutsunea nabarmena dela euskararekiko. Baina horiek beste kontu batzuk dira eta beste baterako utzi beharko ditugu…
• Aurrekoa irakurrita eman dezake dena politikarien esku dagoela, onerako ala txarrerako, baina ez dugu ahaztu behar herritarrok ere badugula horretan erantzukizuna. Aukera mordo bat dugu parte hartzeko eta askotan ez dugu aprobetxatzen aukera hori behar bezala. Parte hartzea kexatzearekin edo kritikarekin nahasten dugu (gutxitan kritika eraikitzaileak edota ekarpenak egiteko, zorionak emateko, …) eta horretan ere bide luzea daukagu aurretik. Benetako partaidetzaren kultura sustatu nahi bada, eskoletan eta familietan landu beharko da gaia eta horretan ere urratsak ematen hasi beharko gara.

Atzo, Euskadi Irratiko Amarauna saioan,  Mikel Iturria (@iturri) eta biok egon ginen Arantxa Artza eta Edurne Ayusorekin batera, Donostiako EITBko estudioetan. Ondorengo gaiak izan genituen hizpide:

• Korrikaren amaiera, zuzenean Andoni Mutiloarekin konexioa eginda.
• Gorka Julio (@teketen) ez zen gurekin izan Errenteriako Mikelazulo elkartean gosari-solasaldia izan zuelako. Internet eta sareak: ekintza eta sormenerako tresnak.
• YouTubetik datozkigun azken berriak:
  • YouTube live zuzenean emititzen hasi da.
  • YouTubera egile eskubideak urratzen dituzten bideoak igotzen dituzte erabiltzaileek egile eskubideen inguruko galdeketa bat egin beharko dute bideoak igotzen jarraitu ahal izateko. (Youtube Copyright School)
• Google Videos-en itxiera.
• Spotify: musika dohainik eta mugarik gabe entzuteko mauka bukatu zaigu?
• Amarauneko aspaldiko bi lagun: Josi Sierrak Joxe Arantzabali “Zortzigarren probintziaz” egindako elkarrizketa sarean.
• Denborak, beti bezala, ihes egin zigun eta aipatu gabe geratu zitzaigun Diario Vascok, apirilaren 14an eta 15ean, Donostiako Kursaalean antolatutako II. Hiritar Digital Nazioarteko kongresua. Twitter bidez hitz egin genuenari begitxo bat bota nahi badiozu, hementxe duzu haria.

Saioa entzun nahi baduzu:

EITBko Teknoflash programaren azken saioan, besteak beste, Creative Commons lizentzia sortei buruzko infografiaren itzulpena aipatu dute. Hementxe uzten dizuet minutu eta erdiko bideoa. Mila esker, TeknoFlash, aipamenagatik eta lizentzia hauei buruzko informazioa zabaltzen laguntzeagatik!

Gezurra badirudi ere, urtebete pasatu da dagoeneko Andoaingo Itzalagunean I. Blogsovieta ospatu genuenetik. Batzar hartatik ateratako blogak pixkanaka-pixkanaka aurrera doaz, besteak beste, irakurtzen ari zaren hau. Hementxe doa zerrenda osoa:

• dumdumdigitala.net
• birasuegi.com
• kuartakerre.com
• laiak.com
• andutzkulturtaldea.com
• txintxarrisfera.com
• maitego.com
• ksukun.com
• irauli.com

Ia konturatu gabe iritsi zaigu II. Blogoviet batzarra ospatzeko ordua: internet, sarea, arazo teknikoak eta ez hain teknikoak… Horiek eta gehiago izango ditugu hizpide datorren igandean, Tolosako Errotan, goizeko 11:00etatik aurrera. Berria bazara eta zure domeinu propioarekin blog bat eduki nahi baduzu, hauxe izan daiteke aukera polita.

Honetaz eta hartaz aritu ondoren, bazkaritxo bat ere egingo dugu; beraz, logistika kontuak direla eta, etorri eta bazkaltzen gelditzeko asmoa baduzu, utzi iruzkinetan izena.

Bigarren urte hau ospatzeko bideo eta guzti daukagu! Asier Arsuagak, @artsuaga -k (eta ez Gorka Juliok, lehen ipinita nuen bezala), egindakoa da eta hementxe uzten dut…