Atzo UEUren 2010-2011 ikasturte irekiera ekitaldia egin zen Eibarko Ikastetxe Nagusian.  Bertan, UZTARO Giza eta Gizarte Zientzien aldizkariaren 20. urteurrena ospatu zen Iban Zaldua idazle eta historialariaren hitzaldi batekin. Zoritxarrez, azken momentuko baja izan zen Iban, eta Gidor Bilbaok hartu zuen hitza Ibanek prestatutako hitzaldian “actio” lanak eginez. Benetan interesgarria Zalduak atondutako hitzaldia non historia, umorea eta beste hainbat kontu nahasten ziren.

Hitzaldi labur honetan, Iban Zaldua idazleak, UZTARO Giza eta Gizarte zientzien aldizkariari gorazarre egin ondoren bere hogeigarren urteurrenean, traizio egingo die bere laudorioen terminoei eta, UZTAROri horren ondo egokitzen zaion zientifikotasunaren arauei itzuri eginez (baina urteurrenen gai orokorrari helduz), 1512ko Nafarroaren Konkistaren ospakizunen komenientziaren inguruko bere zalantzak aurkeztuko ditu, eta, kritikak egitea bestelako aukerabiderik eman gabe itsusia dela jakitun, ospakizun horiek ordezkatzeko balizko proposamen alternatibo bat aurkezten saiatuko da. UEUk zuzendari berria aurkeztuko du biharko ikasturte hasiera ekitaldian, Unibertsitatea.net (10-10-21)

Horren aurretik, Uztaro aldizkariaren zuzendari den Jokin Apalategik, urte hauetan aldizkaria josten ibilitako kideen aipamena egiteaz gain, 20 urte hauetan izandako anekdotak, bizipenak eta beste hainbat ekarri zituen gogora.

Era berean, ekitaldi hau baliatu zen UEUren Zuzendari berriaren aurkezpen ofiziala egiteko. Zehatzago izateko, aldez aurretik bazkideek izandako batzarrean hautatu zen erakundearen buru berria. Lore Erriondok, 5 urte eta erdiz zuzendari aritu ostean, kargua utzi eta lekukoa aspalditik UEUn bertan aritutako Karmele Artetxe historialari eta ikertzaileari eman zion. Izendapena Sustatun, Berrian eta Diariovasco.com-en, besteak beste, jasota dago.

Amaitzeko, pintxoak eta hartu-eman polita izan genuen bertaratu ginenon artean. Hau guztia Eibarko Isasi-Markeskoa jauretxean gertatu zen, autoritate, lagun eta, batez ere, UEUko kideak lekuko zirela.

Gaur Euskadi Irratiko Amarauna saioan, blogarien tartean, ezohiko hirukotea osatu dugu Haritz Rodriguez, Josu Mendicute eta hirurok. Estudioan Edurne Ayusok izan du gaurkoan hitza, eta Andoni Mutiloak Nafarroa Oinezetik egin du zuzenean konexioa, hango gorabeherak azaltzeko. Beti bezala, tartea motz samar geratu zaigu; halere, izan dugu astirik ondorengo gaiei buruz hitz egiteko:

• tokitan.tv: sortzailea, Haritz Rodriguez, estudioetan genuela aprobetxatuz, gunea abian jarri zenetik hona nola joan den azaldu digu (izan duen harrera,  azken bideoak, hurrengoak… Egokieraz baliatuz, esango dugu tokitan.tv Bitacoras sarietako hautagaien artean dagoela, bidaietako blog onenaren atalean.
• Eibarren izan den lipdub lehiaketa, Eibar.org-ek antolatuta. Josu Mendicutek ekarri dizkigu zuzeneko berriak; izan ere, bera antolaketa barruan sartuta egon baita.
• Atal berri bati eman diogu hasiera: aplikazioen txokoa. Asmoa Interneteko munduan ibili edo ez ibili, denontzako erabilgarriak izan daitezkeen aplikazio errazak ezagutzera ematea da. Atala Doodle aplikazioarekin estreinatu dugu, hitzorduak zehazteko edo edozein gertakari programatzeko balio duen aplikazioa. Oraindik ezagutzen ez duzuenoi, probatzera animatu nahi zaituztet; izan ere, oso aplikazio sinplea eta eraginkorra baita. Esango didazue!
• Azkenik, Andu Lertxundi zoriondu nahi izan dugu, ez bakarrik jaso berri duen Espainiako Entsegu Sari nazionala dela eta, baina baita blogari lanetan eta sarean egin duen ibilbide oparoagatik ere.

Joxe Rojasek Teknopataren txokoan utzi digu saioaren grabazioa. Entzun edo jaitsi nahi baduzue, egin klik:

• Amarauna, 2010-10-17 ( Teknopataren txokoan)
• EITBn:

Dakizuen bezala, aurreko astean eta oporrak majo gozatu ondoren, blogariok Euskadi Irratiko Amarauna irratsaiora itzuli ginen. Gaur goizekoa Mikel Iturria (@iturri), Gorka Julio (@teketen) eta hiruron txanda izan da, eta hantxe izan gara, Miramonen, Arantxa Artza eta Andoni Mutiloarekin batera honetaz eta hartaz hitz egiteko prest.

Besteak beste, hauek izan dira landutako gaiak:

• Gipuzkoa 2.0 Elkarlanean egitasmoa. G 2.0 Elkarlanean egitasmoaren helburua da, Gipuzkoako kultur eragileen artean adostea zein erronka eta tresna behar ditugun, Interneten eremuan, euskal kultura normaltasunez eta denon eskura izan ahal izateko.
• Ecuadorren izan den Estatu Kolpearen saiakerak Twitterren izan duen oihartzuna. Fidagarria da Twitter mota honetako albisteak azaltzeko orduan?  Jarraipena egiteko erabilitako etiketa batzuk: #Ecuador eta #Correa
• Youtube eta Real Academia Española uztartzen dituen ekimena: Quijote telebista.
• Mondragon Unibertsitateak Internet bidezko telebista bat sortu du, MUtelebista, eta berau izango da Mondragon taldeko lehen telebista korporatiboa (Joxe Aranzabal, Sustatun)
• Euskalmapa.com
• Filmak jatorrizko bertsioetan ETB3n

Ikusten duzuen bezala, gai ugariri buruz hitz egiteko astia izan dugu gaurko tartean. Beraz, onena entzutea izango duzue. Amaitzeko ekimen hau ere izan dugu hizpide: Euskal Herria dantzan.

Joxe Rojasek Teknopataren txokoan utzi digu saioaren grabazioa. Entzun nahi baduzue, egin klik:

• Amarauna, 2010-10-03 ( Teknopataren txokoan eta EITBn)
• Aurreko saio guztiak