Donostiako Zinemaldiaren 58. edizioa ospatu nahian, aurtengo estreinaldi, zuzendari, aktore eta betiko kontuekin hitzapasa bat sortu dut. Animatzen zarete zuen jakintza, alor honetan,  neurtzera? Jarraian zenbat asmatu dituzuen nirekin partekatu nahi izanez gero, utzi erantzunetan eta barre pixka bat egingo dugu. 

Egin klik hemen edo irudiaren gainean, hitzapasari ekiteko:

Pentsatzen nuenean ia dena ikusita nuela eta ia ezerk ez ninduela harritzen, hara non azaltzen den nire Twitterrean Marc Alder texastarra!  Alderrek ( @marcadler ) honela definitzen du bere burua:  “Japanese translator, learning Basque and interested in other languages. News junkie.”

Bada, kontua da, duela ez asko, euskarazko Gaurko Hitza bere Twitterrean ingelesera itzulita ematen hasi zela. Geroago, ingelesez emateaz gain, japonierara ere itzultzen hasi zen. Orain, ahoskera eta guzti ematen du. Ze ona, ezta? Niri, behintzat, izugarrizko ilusioa egin zidan ikusi nuenean! Ikusteko zertaz ari naizen, hementxe gaur goizean argitaratu dudan hitzaren bi bertsioak: euskara-ingelesa eta euskara-japoniera.

1. 
   marcadler [Basque Word of the Day] hamaiketako: mid-morning snack http://bit.ly/aLiLvY via @euskaljakintza

— this quote was brought to you by quoteurl

1. 
   marcadler [今日のバスク語] hamaiketako: 午前中の軽食 (gozenchū no keishoku) http://bit.ly/aLiLvY via @euskaljakintza

— this quote was brought to you by quoteurl

Hemendik aurrera, japonierazko itzulpena iritsi ahala, hura ere txertatuko dut. Mila esker, Marc!

Ordiziako Udalaren berrien kanaletik  informazio hauxe iritsi zait gaur, Ana Irastortza komunikazio teknikariaren eskutik. Interesgarria iruditu zait eta hementxe uzten dizuet bere horretan:

Ordiziako Udalak eta D´elikatuz zentroak Ni ere azokara proiektua antolatu dute. Proiektuaren helburua Ordiziako merkatuan astero erosketak egin ezin dituzten ordiziarrek aurrerantzean inguruko baserritar eta saltzaileek ekartzen dituzten produktuak erosteko aukera izatea da. Alejandra Iturrioz, Udaleko Sustapen eta Garapena, Merkataritza eta Turismo zinegotziak, Leire Arandia, D´elikatuz zentroaren zuzendariak eta Edurne Jauregi, Baliarrango baserritarrak aurkeztu dute datorren urriaren 6an hasiko den ekimen hau.

Programa honen bidez D´elikatuz zentroak erosketak egingo dizkie, hainbat arrazoi medio, asteazken goizean merkatura hurbildu ezin duten eta baserritarren produktuak eskuratu nahi duten pertsonei. Abuztuan zehar aurkeztu zitzaien proiektua plaza barruan jartzen diren saltzaile gehienei, eta dagoeneko saltzaile batzuk baiezkoa eman diote proiektu honi.

Alejandra Iturriozek zehaztu du proiektu hau merkatuaren 500. urteurrena ospatzeko lanean ari den batzordean sortu dela, Udalak Ordiziako azokaren eta baserritarren etorkizunaz duen kezkaren harira. “Urteak daramatzagu bezeroak erakartzeko ideiak landuz. Horrela sortu zen, adibidez, ostiral arratsaldeko azoka. Baditu bere bezeroak, baina ez da nahiko. Beste pausu bat eman nahian, garai batean ezaguna zen mandatugilearen edo errekadistaren figura berreskuratu nahi izan dugu. Gure kasuan, D´elikatuz zentroa izango da mandatugilearen lana egingo duena”.

Fideltasun konpromisoa

Proiektua martxan jartzeko saltzaileekin produktuen eta prezioen zerrenda egin zen, eta orain bezeroak hartzeko kanpaina hasi da. “Bezeroaren fideltasuna lortu nahi dugu. Astero gutxienez 10 euroko erosketa egingo duen bezeroaren bila gabiltza. D´elikatuz zentrotik denboraldi bakoitzean produktu finkoen zerrenda luzatuko diogu bezeroari, bai eta astero gehitzen diren produktuen zerrenda ere. Astearte eguerdirako bezeroak erosi nahi dituen produktuen zerrenda emango digu. Guk asteazken goizean egingo dugu erosketa eta poltsak takiletan, edota beharrezko balitz, D´elikatuz zentroaren hozkailuan jasoko ditugu bezeroa etorri eta jaso arte. Zentroaren ordutegia goizez 10:00etatik 13:00etara da, eta arratsaldez 16.00etatik 19:00etara. Zerbitzu honek ez du inolako kosturik saltzaile eta eroslearentzat”, azaldu du D´elikatuz zentroko zuzendari Leire Arandiak.

Produktuen zerrendak ondorengo ezaugarriak ditu. “Euskal Herriko barazki eta frutak eskainiko ditugu. Baita azokari balio erantsia ematen dion produktua. Hala nola: Idiazabal gazta, perretxikoak eta produktu ekologikoak. Datu zehatzak eskainiko dizkiogu erosleari; zer eta nori erosten dion produktua, eta nondik datorren kontsumituko dugun produktua. Adibidez, negutegiko barazkiak, negutegikoak direla zehaztuko dugu”, gehitu du Arandiak.

Helburua: Baserritarren eta azokaren biziraupena

Edurne Jauregi programan parte hartuko duen baserritar bat da eta herritarrak animatu nahi ditu proiektu honetan parte hartzera. Ekimena oso ideia ona iruditzen zaio, eta bide batez azoka eta baserritarren lana bizirauten lagunduko duela uste du.

Iturriozen esanetan, “merkatua maite dugun ordiziar guztiontzat aukera berri bat da hau, Ordiziako herria 500 urtetan zehar nekazaritza eta merkataritza erreferente bilakatu duen azoka indartzea, hain zuzen ere. Gure historiaren eta gure ekonomiaren ardatz izan da, eta jakina, ezin dugu galtzen utzi”.

Proiektu honetan parte hartu nahi duten bezeroek informazio gehiago jaso eta zalantzak argitu ahal izango dituzte D´elikatuz zentroan hitzordu bat hartuz 943882290 telefonoan, delikatuz@ordizia.org helbidera mezua bidaliz edota Andre Maria kalean dagoen zentrora joanez.

Ekimen honen arduradunek programan parte hartuko duten bezeroen artean urria, azaroa eta abendu amaieran zozketatuko diren sarien berri emango dute laster.

Gaurko Hitza ekimenak urtea bete zuen egunetik hasita, hitz hori bideoz lagundu izan dugu igandero, zuetako askok dakizuen bezala. Beste hizkuntza batean, ingelesez hain zuzen, egiten zutela ikusi, ideia gustatu eta gurera ekarri genuen. Horretarako, Pernan Goñi komikigile eskuzabalaren laguntza izan dugu 45 igandez. 45 igande eta, beraz, 45 ilustrazio izan dira gure lankidetzaren emaitza. Azkar esaten da!

Gaur, baina, Pernani agur esan eta eskerrak emateko ordua heldu da. Eskerrak, ez bakarrik berak hartu duen lanagatik (hitzak hautatu, ilustrazioak egin…), baita azkar asko erantzuteagatik ere azken minutuan beste hitzen bat edo aldaketaren bat eskatu izan diodanean (Reala igo zen igandean, adibidez), edota beste hainbat konturengatik. Hitz gutxitan, beti laguntzeko prest egoteagatik.

Pernan, Gaurko Hitzarako egin dituzun 45 marrazkiekin osatutako bideo xume hau zuretzat. Ez da gauza handia, baina, tira,  opari txiki bat bihotzez eskertzeko egindako lan guztia. Ea etorkizunean ere proiekturen batean elkarrekin lan egiteko aukera dugun!  Mila esker, Pernan!

• Gaurko Hitzarako ilustrazioen bilduma